راولپنڈی (پاک صحافت) پنجاب کی سینئر وزیر مریم اورنگزیب نے کہا ہے کہ ن لیگ نے جب بھی ملک کی باگ ڈور سنبھالی، پاکستان نے ترقی کی۔
تفصیلات کے مطابق ستھرا پنجاب کی افتتاحی تقریب سے خطاب کرتے ہوئے سینئر صوبائی وزیر مریم اورنگزیب نے کہا ہے کہ مریم نواز انتہائی متحرک وزیراعلی ہیں، ستھرا پنجاب پروگرام انقلابی پروگرام ہے، پروگرام کے تحت پنجاب بھر کے شہروں اور دیہات کی صفائی یقینی بنائی جائے گی۔ ستھرا پنجاب پروگرام شروع کرکے وزیراعلی مریم نواز نے مثال قائم کی، ستھرا پنجاب ڈور ٹو ڈور ویسٹ کلیکشن کا پروگرام ہے، اگلے مرحلے میں ویسٹ سے انرجی بنانے کا مرحلہ شروع ہوگا، پنجاب کے ہر شہر کو مثالی بنائیں گے، پنجاب کو صاف ستھرا بنانے کیلئے دن رات کوشاں ہیں۔
مریم اورنگزیب کا مزید کہنا تھا کہ ن لیگ نے جب بھی ملک کی باگ ڈور سنبھالی، ملک نے ترقی کی، ہم فساد اور انتشار کی نہیں ترقی کی بات کرتے ہیں، تحریک انصاف کے 4 سال میں ملک کو تباہ کردیا گیا، ملک میں بیروزگاری اور دہشتگردی واپس آگئی تھی، ترقی کرتے ملک کی معیشت کو تباہ کردیا گیا، انہوں نے کاغذ لہرا کر کہا میرے خلاف سازش ہوئی۔
انہوں نے کہا کہ نواز شریف نے ملک کو ترقی کی جانب گامزن کیا تھا، نواز شریف نے کہا کہ سیاست کو ریاست پر ترجیح نہیں دے سکتے، جب اقتدار سنبھالا تو ملک ڈیفالٹ کے قریب تھا، شہباز شریف اور ان کی ٹیم نے ملک کو ڈیفالٹ سے نکالا، آج ملک میں ترقی ہورہی ہے، سٹاک ایکس چینج بلند ترین سطح پر ہے۔