لاہور (پاک صحافت) پاکستان مسلم لیگ ن کے رہنما خواجہ سعد رفیق نے کہا ہے کہ نو منتخب امریکی صدر کے نمائندہ خصوصی رچرڈ گرینل کا ضمیر اچانک جاگ گیا ہے۔
تفصیلات کے مطابق خواجہ سعد رفیق نے کہا کہ رچرڈ گرینل کا ضمیر 2018 کے الیکشن چوری سے سیاسی انتقام کے سیاہ دور تک سو رہا تھا، ان کا ضمیر اپوزیشن لیڈروں کی طویل قید پر سو رہا تھا۔ فلسطینیوں کی نسل کشی پر رچرڈ گرینل کا مردہ ضمیر آج بھی غاصب صہیونیوں کے ساتھ ہے، ان جیسے بے ضمیر لوگوں کا شعور صرف سامراجی عزائم کی تکمیل کے لیے ہی جاگتا ہے۔
رہنما مسلم لیگ ن نے مزید کہا کہ رچرڈ گرینل جیسے لوگوں کا انسانیت، انصاف، جمہوریت اور قانون کی حکمرانی سے کوئی تعلق نہیں، ان کا مطالبہ کچھ اور مقاصد کچھ اور ہوتے ہیں۔
سعد رفیق نے یہ بھی کہا کہ پاکستان کو بخوبی علم ہے یہ سب مل کر چین بلاک کو توڑنے کی کوشش کریں گے، پاکستان کو بخوبی علم ہے یہ ایران کو گھیرنے کے لیے پاکستان پر دباؤ ڈالنے کی کوشش کریں گے، رچرڈ گرینل جیسے لوگوں نے پہلے بھی ایسا کیا لیکن رب کائنات نے پاکستان کو محفوظ اور مضبوط رکھا۔