میرے استعفی سے دہشتگردی کم ہوتی ہے تو تیار ہوں۔ وزیراعلی بلوچستان

کوئٹہ (پاک صحافت) وزیراعلی بلوچستان میر سرفراز بگٹی نے کہا ہے کہ میرے استعفی سے اگر دہشتگردی کے واقعات میں کمی آتی ہے تو میں ضرور استعفی دوں گا۔

تفصیلات کے مطابق وزیراعلی بلوچستان میر سرفراز بگٹی نے کہا ہے کہ بلوچستان میں دہشتگردی کے بڑھتے واقعات تشویشناک ہیں، دہشتگردوں نے ایک بار پھر سافٹ ٹارگٹ کو نشانہ بنایا، دہشتگردوں نے معصوم اور نہتے مزدوروں کو شہید کیا، 30 ہزار سے زائد مزدور کول مائنز میں کام کررہے ہیں۔

انہوں نے کہا کہ میرے مستعفی ہونے سے اگر دہشتگردی کے واقعات میں کمی آتی ہے تو میں ضرور استعفی دوں گا، مجھے اسمبلی نے وزیراعلی بنایا ہے اگر اراکین چاہیں گے تو میں ضرور مستعفی ہو جاؤں گا، دہشتگردی کی خلاف بحیثیت قوم جنگ لڑنا ہوگی۔

وزیراعلی بلوچستان کا کہنا تھا کہ سکیورٹی فورسز دہشتگردی کا ڈٹ کر مقابلہ کررہی ہیں، ریاست کیلئے دہشتگردوں کے خلاف آپریشن کرنا مشکل نہیں،اپیکس کمیٹی کا اجلاس طلب کیا گیا ہے جہاں دہشتگردی کے واقعات پر غور کیا جائے گا، اجلاس میں سکیورٹی پلان کا ازسر نو جائزہ لیا جائے گا۔

انہوں نے مزید کہا کہ صوبے کے تمام سرکاری ہسپتالوں میں ادویات کی فراہمی کی ہدایت کردی ہے، محکمہ صحت میں بہتری کیلئے قابل افسران کو تعینات کیا گیا ہے۔