لاہور (پاک صحافت) پنجاب کی سینئر وزیر مریم اورنگزیب نے کہا ہے کہ ملک کے مختلف علاقوں میں درجہ حرارت خطرناک حد تک بڑھنے کا امکان ہے۔
تفصیلات کے مطابق مریم اورنگزیب نے کہا ہے کہ درجہ حرارت میں اضافے سے ہیٹ سٹروک، پانی کی کمی اور صحت کے دیگر مسائل کا خدشہ ہے۔ عوام غیر ضروری طور پر دھوپ میں باہر نہ نکلیں، پانی کا زیادہ استعمال کریں اور سر ڈھانپ کر رکھیں۔
صوبائی وزیر مریم اورنگزیب کا مزید کہنا تھا کہ صورتحال کے پیش نظر ہسپتالوں میں ایمرجنسی انتظامات کئے جا رہے ہیں۔ تعلیمی ادارے اسمبلی کا وقت محدود کریں، طالب علموں کو گرمی سے بچاو¿ کی ہدایات جاری کریں۔ حاملہ خواتین، دل اور شوگر کے مریض احتیاط برتیں، دھوپ اور گرمی سے دور رہیں۔
انہوں نے کہا کہ جانوروں کو سایہ دار جگہ پر رکھیں، پینے کے صاف پانی کی دستیابی یقینی بنائیں۔ صوبائی وزیر نے محکمہ صحت کو ہسپتالوں میں ہیٹ سٹروک ڈیسک قائم کرنے اور الرٹ رہنے کی ہدایت کردی۔