اسلام آباد (پاک صحافت) امیرجماعت اسلامی حافظ نعیم الرحمن کی اپیل پرملک کے مختلف شہروں میں اسرائیلی سفاکیت کےخلاف احتجاج اورریلیاں نکالی گئیں۔ لاہورمیں بھی جماعت اسلامی کےسیکرٹری جنرل امیرالعظیم کی قیادت میں مظاہرہ کیا گیا۔
تفصیلات کے مطابق شرکا سےخطاب کرتے ہوئے سیکرٹری جنرل امیر العظیم نے کہا ہے کہ امریکہ دنیا میں امن کا علمبردار بنتا ہے لیکن حقیقت میں دنیا کے کس کونے میں جنگ برپا نہیں رکھی۔ عالمی سامراج امریکہ کبھی عرب تو کبھی اسرائیل کا چہرہ آگے کرکے چھپتا ہے۔ امریکہ نےجنگ بندی کی قراردادوں کو ویٹو کیا اسرائیل کی جرات نہیں وہ تو چھوٹا سا جزیرہ ہے۔
مظاہرین کا مزید کہنا تھا کہ امریکہ عرب ممالک کو کہتا کہ اسرائیلی فلسطینی جنگ میں خاموش تماشائی بن جاؤ۔فلسطینی بھائیوں نے لمبے عرصے سے اسرائیل و امریکہ کے تمام نقشوں کو ملیا میٹ کردیا ہے جس کے بارے وہ کہتے 2023 گریٹر اسرائیل کی بنیاد بنے گا۔ دنیا دیکھ رہی ہے کس طرح فلسطین میں سینکڑوں لوگ لقمہ اجل بن رہے ہیں۔
دوسری جانب اسلام آباد ڈی چوک پر جماعت اسلامی کے زیراہتمام سیو غزہ احتجاجی مظاہرہ کیا گیا، خواتین اور بچوں سمیت جماعت اسلامی کے کارکنوں کی بڑی تعداد نے شرکت کی فلسطین کے پرچم اٹھا شرکاء نے اسرائیل کے خلاف نعرے بازی کی۔