لاہور (پاک صحافت) اسحاق ڈار کا کہنا ہے کہ ملک کے ساتھ غداری کرنے والوں کا انجام بڑا بھیانک ہوتا ہے۔
تفصیلات کے مطابق نائب وزیراعظم اسحاق ڈار نے کہا ہے کہ پاکستان کلمے کی بنیاد پر بنا ہے، ماضی میں ملک دو لخت ہوا، ہم نے آدھا حصہ گنوا دیا، جنہوں نے ملک کو دولخت کیا ان کا حال بہت برا ہوا۔ پاکستان کی خدمت کرکے نوکری کررہا ہوں، میں کبھی عہدوں کے پیچھے نہیں بھاگا، اللہ کا فضل ہے پہلے بھی وزیر خزانہ رہا، اس بار مجھے کئی ذمہ داریاں ملی ہیں۔
اسحاق ڈار کا مزید کہنا تھا کہ ڈپلومیٹک طور پر کہتے تھے پاکستان تنہائی کا شکار ہوگیا ہے، ہم نے نوازشریف کی قیادت میں پاکستان کو دنیا کی 24ویں بڑی معیشت بنایا تھا۔ ہماری پچھلی حکومت کے بعد اگلے 4 سال میں پاکستان 47 ویں معیشت بن گیا، کہا جاتا تھا پاکستان کو بھنور سے نکلنے میں 15سال لگیں گے۔
انہوں نے کہا کہ نواز شریف کی حکومت میں اللہ کے فضل سے پاکستان کو مشکلات سے نکلنے میں صرف ساڑھے 3 سال لگے۔ 2013 میں گھنٹوں لوڈشیڈنگ اور دھماکے ہوتے تھے، اگلے ساڑھے 3 سالوں میں لوڈشیڈنگ ،دہشتگردی کا خاتمہ ہوا اور پاکستان 24 ویں معیشت پر پہنچا، کوئی دو آرا نہیں کہ پاکستان نے گزشتہ 4 سال میں معاشی طور پر نقصان اٹھایا۔