اسلام آباد (پاک صحافت) سردار ایاز صادق کا کہنا ہے کہ ملک کی ترقی و خوشحالی کیلئے جذبۂ ابراہیمی پر عمل پیرا ہونے کی ضرورت ہے۔
تفصیلات کے مطابق اسپیکر قومی اسمبلی سردار ایاز صادق نے عیدِ قرباں کے موقع پر اپنے پیغام میں کہا کہ عید الاضحی حضرت ابراہیم علیہ السّلام کی عظیم قربانی کی یاد دلاتی ہے۔ عید پر مستحق افراد کو اپنی خوشیوں میں شامل رکھیں۔ عید الاضحی ایثار، قربانی، محبت اور رواداری کا درس دیتی ہے اس لیے ہمیں ضرورت مندوں کی مدد کرنے کی ضرورت ہے۔
سردار ایاز صادق کا مزید کہنا ہے کہ پاکستان کی معاشی ترقی اور خوشحالی پارلیمان کی اولین ترجیح ہے۔ حج اور عید الاضحی کے اجتماعات سے ہمیں حسن سلوک، بھائی چارے اور رواداری کا درس ملتا ہے۔ اُنہوں نے امتِ مسلمہ کی یکجہتی اور اتحاد کے لیے نیک خواہشات کا اظہار کرتے ہوئے کہا کہ فلسطین اور مقبوضہ کشمیر کے مسلمانوں پر انسانیت سوز مظالم اور جارحیت قابلِ مذمت ہیں۔
انہوں نے کہا کہ فلسطینی عوام پر ظلم اور زیادتیوں کے مناظر نہ پہلے کسی نے دیکھے ہیں اور نہ ہی رہتی دنیا تک اس کی کوئی مثال ملے گی، کشمیری عوام کو بھی قابض بھارتی فوج کی جانب سے بدترین مظالم کا سامنا ہے۔ فلسطین میں انسانی حقوق کی سنگین خلاف ورزیوں پر اقوام عالم کی خاموشی لمحہ فکریہ ہے۔