ملک مسائل میں جب ڈوب جاتا ہے، تب ہی نواز شریف اور شہباز شریف کو آنا پڑتا ہے، مریم نواز

گوجرانوالہ (پاک صحافت) پاکستان مسلم لیگ ن کی نائب صدر مریم نواز نے کہا ہے کہ مشکل معاشی حالات میں ڈوبا ملک پہلی بار ہمیں نہیں ملا۔ انہوں نے کہا کہ ملک مسائل میں جب ڈوب جاتا ہے، تب ہی نواز شریف اور شہباز شریف کو آنا پڑتا ہے۔

تفصیلات کے مطابق مریم نواز کی زیرصدارت گوجرانوالہ میں پارلیمینٹرینز اور تنظیمی عہدیداروں کا اجلاس ہوا، جس سے خطاب کرتے ہوئے  انہوں نے کہا کہ آپ کی شناخت اور جماعت کو مٹانے والے اللّٰہ کے کرم سے خود مٹ گئے، ہماری قیادت ایمان دار، نیک نام اور عوام کی کارکردگی کے امتحان میں سرخرو ہوئی۔ انہوں نے کہا کہ الزام لگانے والے آج منہ چھپاتے پھرتے ہیں۔

واضح رہے کہ اس موقع پر مریم نواز نے مزید کہا کہ پتلی تماشا کرنے والے گھروں میں قید ہو چکے ہیں، آج مشکل ضرور لیکن اللّٰہ کی مدد سے لوڈشیڈنگ کے اندھیروں کی طرح معاشی اندھیرے بھی ختم ہوں گے۔ سازشیوں کی سازش ہے کہ معیشت نہ سنبھلے، ہمیشہ کی طرح شیر ہی قوم کو مسائل اور انہیں پیدا کرنے والے گیدڑوں سے نجات دلائے گا۔