کوئٹہ (پاک صحافت) بی اے پی کے صوبائی سیکرٹری اطلاعات چودھری شبیر اور مرکزی رہنما میر ظفر قمبرانی سیکڑوں ساتھیوں سمیت مسلم لیگ ن میں شامل ہوگئے ہیں۔
تفصیلات کے مطابق مسلم لیگ ن بلوچستان کے زیراہتمام مختلف جماعتوں کے کارکنوں کی پارٹی میں شمولیت کیلئے جلسے کا انعقاد کیا گیا، ن لیگ بلوچستان کے صدر شیخ جعفر کی موجودگی میں چودھری شبیر اور میر ظفر قمبرانی نے ن لیگ میں شمولیت کا اعلان کیا۔
چودھری شبیر نے جلسے سے خطاب کرتے ہوئے کہا کہ پہلے بھی مسلم لیگ (ن) سے وابستہ تھا، اب دوبارہ شامل ہوکر فخر محسوس کررہا ہوں، مسلم لیگ چھوڑنے کی اپنی غلطی کو تسلیم کرتا ہوں، بلوچستان میں ن لیگ کے قافلے کو مزید آگے بڑھائیں گے۔
میر ظفر قمبرانی نے خطاب کرتے ہوئے کہا کہ بلوچستان میں (ن) لیگ ہی عوام کے حقیقی مسائل حل کرے گی، پارٹی کو کوئٹہ کی قدیم آبادیوں میں پذیرائی حاصل ہے مگر ماضی میں مناسب نمائندگی نہیں ملی، بے روزگاری اور تعلیم کے فقدان نے لوگوں کو پریشان کررکھا ہے۔