لاہور (پاک صحافت) وزیراعلی پنجاب مریم نواز نے آئندہ ماہ صوبہ بھر میں 20 ہزار گھروں کی تعمیر کا ہدف دے دیا۔
تفصیلات کے مطابق وزیراعلی پنجاب مریم نواز کی زیر صدارت خصوصی اجلاس ہوا جس میں اپنی چھت اپنا گھر پروگرام کے منصوبے پر پیش رفت کا تفصیلی جائزہ لیا گیا۔ اجلاس میں پنجاب میں بے گھر شہریوں کو مفت پلاٹ دینے کیلئے سکیم کا تفصیلی جائزہ بھی لیا گیا، سفارشات اور تجاویز پر غور کر کے 9 ہزار 15 مکانوں کی تعمیر کے لئے 8 ارب 20 کروڑ روپے کے قرضے جاری کئے گئے۔
ذرائع کے مطابق اجلاس میں بریفنگ دیتے ہوئے بتایا گیا کہ 2050 افراد کو مکانات کی تعمیرات کیلئے قرض کی دوسری قسط بھی مل گئی، اپنی چھت اپنا گھر پروگرام کے تحت 4841 گھر زیر تکمیل ہیں، اپنی چھت اپنا گھر پورٹل پر وزٹ کرنے والے شہریوں کی تعداد 7 لاکھ 28 ہزار سے بڑھ گئی ہے۔
بریفنگ کے مطابق اپنی چھت اپنا گھر پروگرام کیلئے تقریباً 4 لاکھ سے زائد درخواستیں مکمل دستاویزات کے ساتھ آگئی ہیں، 74 ہزار سے زائد ڈرافٹ درخواستیں بھی اپنی چھت اپنا گھر پورٹل میں جمع ہیں۔
وزیراعلی مریم نواز شریف کی ہدایت پر 3 اور 5 مرلے کی ہاؤسنگ سکیموں کا تفصیلی جائزہ لیا گیا، عوام کو فری پلاٹ دینے کے لئے ٹی او آرز طے کرنے کے لئے 8 رکنی کمیٹی قائم کر دی گئی، وزیراعلی نے پنجاب میں گھر بنانے کا ہدف پورا کرنے کا حکم دے دیا۔