لاہور (پاک صحافت) پیٹرولیم مصنوعات کی قیمتوں میں حالیہ کمی کے بعد وزیراعلی پنجاب مریم نواز نے ٹرانسپورٹ کرایوں میں کمی یقینی بنانے کا حکم جاری کر دیا۔
تفصیلات کے مطابق وزیراعلی مریم نواز کی زیرِ صدارت اجلاس ہوا جس میں محکمہ ٹرانسپورٹ سے متعلق امور کا جائزہ کیا گیا۔ اجلاس میں مریم نواز نے لاہور کے حوالے سے پبلک ٹرانسپورٹ کا 5 سالہ پلان طلب کرتے ہوئے شہر میں پرپل اور بلیو لائن ٹرین کے لیے بہترین انٹرنیشنل کنسلٹنٹ سے رجوع کی ہدایت کی۔
اجلاس میں وزیراعلی پنجاب کو صوبے بھر میں 630 ایکو فرینڈلی بسوں سے متعلق بریفنگ دی گئی اور بتایا گیا کہ لاہور کے لیے 200 ایکو فرینڈلی ڈیزل ہائبرڈ بسیں لائی جا رہی ہے، شہر میں 100 الیکٹرک بسیں پائلٹ پروجیکٹ کے طور پر چلائی جائیں گی۔
اس موقع پر اجلاس سے گفتگو کرتے ہوئے وزیراعلی پنجاب مریم نواز نے تمام اضلاع میں انتظامیہ کو کرایوں میں کمی پر عمل کروانے کی ہدایت کرتے ہوئے کہا کہ تیل کی قیمتوں میں کمی کا فائدہ براہ راست عوام کو پہنچایا جائے۔
انہوں نے مزید کہا کہ کرایے اشیائے خورد و نوش سمیت تمام دیگر اشیا کے نرخ پر اثر انداز ہوتے ہیں، ٹرانسپورٹ کرایے کم کر کے عوام کو ریلیف دیں گے۔