متحدہ قومی موومنٹ، پی ٹی آئی کی پابند نہیں ہے۔ عامر خان

کراچی (پاک صحافت) عامر خان کا کہنا ہے کہ ایم کیو ایم اب پی ٹی آئی کی پابند نہیں، جو فیصلہ مناسب سمجھیں گے وہی کریں گے، ہمیں حکومت سے زیادہ عوام کے ساتھ ہمدردی ہے۔

تفصیلات کے مطابق متحدہ قومی موومنٹ کے رہنما عامر خان نے نجی ٹی وی چینل کے پروگرام میں گفتگو کرتے ہوئے کہا ہے کہ حکومت کے ساتھ رہنے یا نہ رہنے کے حوالے سے ان کے آپشنز کھلے ہوئے ہیں۔ انہوں نے کہا کہ ان کی جماعت پی ٹی آئی کی پابند نہیں ہے، جب مناسب سمجھیں گے فیصلہ کریں گے۔

ایم کیو ایم رہنما عامر خان کا مزید کہنا تھا کہ اب حکومت ان کی جماعت کو کوئی وزارت دے گی بھی تو حکومت کے سامنے ہاتھ جوڑیں گے کیونکہ معاشی پالیسیوں کا بوجھ اٹھاتے ہوئے اب ان کی ٹانگیں کانپ رہی ہیں، ہم اب مزید یہ بوجھ نہیں اٹھا سکتے۔