اسلام آباد (پاک صحافت) وزیر داخلہ محسن نقوی کا کہنا ہے کہ مارگلہ ایکسپریس وے کو موٹر وے سے منسلک کرنے کا منصوبہ شروع کردیا۔
تفصیلات کے مطابق وفاقی وزیر داخلہ محسن نقوی نے کہا ہے کہ مارگلہ ایکسپریس وے کو موٹر وے سے منسلک کرنے کا منصوبہ شروع کردیا ہے۔ امید ہے ان ہزاروں پراجیکٹس کی طرح نہیں ہوگا جن کا لانچ کے بعد کچھ پتہ نہیں ہوتا۔
محسن نقوی کا مزید کہنا تھا کہ گزشتہ ہفتوں میں مارگلہ کی پہاڑیوں پر آگ لگنے کے کئی واقعات ہوئے، چند افراد کو پکڑا بھی گیا، حیران ہوں کہ وہ ایسا کیوں کرتے تھے، عید پر پہلی دفعہ اسلام آباد کے شہریوں کو بیگز تقسیم کیے گئے، 3 روز دن رات کام کرکے ریکارڈ گند اٹھایا گیا۔
انہوں نے کہا کہ یقین دلا سکتا ہوں سی ڈی اے ٹیم آنے والے مہینوں میں بڑی تبدیلی لائے گی، ایف 8 اور ایف 9 کے درمیان فلائی اوور پر کام شروع ہوگا، سیرینا چوک میں بھی انڈر پاس بنایا جائے گا۔