لاہور (پاک صحافت) ملک احمد خان کا کہنا ہے کہ میں لینڈ ریفارمز کے خلاف ہوں، اس پر بات کروں گا تو منافقت ہوگی۔
تفصیلات کے مطابق اسپیکر پنجاب اسمبلی ملک محمد احمد خان نے کہا ہے کہ میں ایک تھیوری کو مانتا ہوں اور وہ تھیوری میرے دل کے قریب ہے۔ اتوار کی چھٹی کی وجہ سے ایئر کوالٹی انڈیکس کم ہوتا ہے، پیر کو ایئر کوالٹی انڈیکس تھوڑا بہتر ہوتا ہے مگر منگل کو بہت اوپر جاتا ہے، اسموگ کے خلاف سر جوڑ کر حکمتِ عملی ترتیب دینے کی جگہ پارلیمنٹ ہے۔
ملک احمد خان کا مزید کہنا تھا کہ اسموگ سے متعلق ہائی کورٹ نے بھی حکومت کے اقدام کی تعریف کی، اسموگ پنجے گاڑھ کر کھڑی ہے، ایک دن میں تو یہ جانی بھی نہیں، ہم دیکھیں گے کہ وہ کیا چیز ہے جسے سپر ٹیکس کہا جا رہا ہے۔
انہوں نے کہا کہ آئی ایم ایف سے جو لیتے ہیں اسے ہم بیل آؤٹ پیکیج کہتے ہیں، پہلے یہ طے کر لیں کہ زراعت پر ٹیکس لگنا چاہیے، اس کا حجم کیا ہوگا، یہاں پر جلسوں کا رواج پارلیمنٹ کی افادیت کو کھا جائے گا۔