اسلام آباد (پاک صحافت) رانا ثناءاللہ نے دعوی کیا ہے کہ لکھ کر دیتا ہوں پی ٹی آئی جلد دوبارہ اسلام آباد آنے کی پوزیشن میں نہیں۔
تفصیلات کے مطابق رانا ثناءاللّٰہ نے کہا کہ پی ٹی آئی کا اسلام آباد میں کوئی انتظام نہیں تھا، صرف لوگوں کو ڈی چوک کا کہہ دیا۔ پی ٹی آئی جلد دوبارہ اسلام آباد آنے کی پوزیشن میں نہیں ہوگی بلکہ کبھی بھی دوبارہ آنے کی پوزیشن میں نہیں ہوگی۔
رانا ثناءاللہ کا مزید کہنا تھا کہ حکومت پختونوں کے خلاف نہیں ہے، پی ٹی آئی نے لوگوں کو ورغلایا کہ مسلح ہوکر اور کفن باندھ کر ہمارے ساتھ آئیں۔ پی ٹی آئی نے ہمیشہ ریاست کے خلاف پروپیگنڈا کیا، جو لوگ گمراہ کرکے خیبرپختونخوا سے مسلح جتھے لائے وہ ذمہ دار ہیں۔
انہوں نے کہا کہ پختونوں سے متعلق پی ٹی آئی پروپیگنڈا کر رہی ہے، خیبر پختونخوا سے 15 سے 20 ہزار کے قریب مسلح لوگ اسلام آباد لائے گئے۔ پی ٹی آئی قیادت معصوم لوگوں کو ورغلا کر احتجاج میں لائی، اس دوران قانون نافذ کرنے والے اداروں کے ڈھائی سو کے قریب اہلکار زخمی ہوئے۔
ان کا کہنا تھا کہ احتجاج سے متعلق پی ٹی آئی کوئی انتظام نہیں تھا، وہاں ان کارکنا مشکل تھا، پی ٹی آئی اب اتنی جلدی دوبارہ احتجاج کی پوزیشن میں نہیں آئے گی۔