لوڈشیڈنگ بڑھ گئی، علی امین کترا رہے کہیں بٹن دبانے سے انکا فیوز نہ آف ہوجائے۔ گورنر کے پی

پشاور (پاک صحافت) فیصل کریم کنڈی کا کہنا ہے کہ بجلی کی لوڈشیڈنگ بڑھنے پر وزیراعلی علی امین گنڈاپور اب بٹن آف کرنے سے کترا رہے ہیں کہ کہیں ان کا اپنا فیوز نہ آف ہوجائے۔

تفصیلات کے مطابق گورنر خیبرپختونخوا فیصلہ کریم کنڈی نے کہا ہے کہ بجلی لوڈشیڈنگ تو ہمارے وزیراعلی نے اپنے سر لے لی تھی، کہتے تھے لوڈشیڈنگ ختم نہ ہوئی تو تربیلا سے بٹن آف کردوں گا، میں انتظار میں ہوں ہمارے وزیراعلی وہ بٹن کب آف کریں گے۔

فیصل کریم کنڈی نے کہا کہ لوڈشیڈنگ بڑھ گئی ہے کم نہیں ہوئی، ایسے دعوے نہیں کرنے چاہئیں، کہہ رہے تھے بٹن بند کردوں گا پورے پاکستان کی بجلی بند ہوجائے گی۔

ان کا مزید کہنا تھا کہ کوشش ہے گورنر شپ کے ہوتے ہوئے اپنے صوبے کے مسائل حل کریں، کوشش ہے صوبے کے لوگوں کو گیس مسائل کا سامنا نہ ہو، ہماری سوئی گیس کے محکمے سے بھی بات چیت جاری ہے، گیس کی لوڈشیڈنگ میں کمی ہوئی ہے۔