اسلام آباد (پاک صحافت) اسحاق ڈار کا کہنا ہے کہ قومی اہمیت کے ایونٹ کے موقع پر احتجاج مثبت پیغام نہیں ہے۔
تفصیلات کے مطابق نائب وزیراعظم اسحاق ڈار نے کہا کہ پاکستان ایس سی او سربراہ اجلاس کے شرکا کے خیرمقدم کے لیے تیار ہے، ایس سی او اجلاس میں رکن اور مبصر ملکوں کے سربراہ اور مندوبین شریک ہوں گے۔ پاکستان میں اس طرح کا بڑا ایونٹ 27 سال بعد ہورہا ہے جس میں غیرملکی وفود کے تقریبا ایک ہزار افراد آئیں گے، پاکستان علاقائی تعاون اور روابط کے فروغ کے لیے پرعزم ہے۔
اسحاق ڈار کا مزید کہنا تھا کہ آج وہ لوگ کدھر ہیں جو کہتے تھے پاکستان سفارتی تنہائی کا شکارہے، اہم مواقع پراحتجاج ایک سیاسی جماعت کا وتیرہ ہے، 9 مئی کو جو کچھ ہوا سب نے دیکھاہے، تحریک انصاف ملکی مفاد کے لیے 15 اکتوبر کی کال کو موخر کرے۔
انہوں نے کہا کہ چین کے وزیراعظم پاکستان کا دوطرفہ دورہ بھی کریں گے جبکہ بھارتی وزیرخارجہ کی طرف سے دوطرفہ ملاقات کی کوئی درخواست موصول نہیں ہوئی۔ تمام اداروں اورمحکموں نے باہمی تعاون سے بہترین انتظامات کیے ہیں، ایس سی او سیکرٹری جنرل میڈیا کو کانفرنس کے بارے میں بریف کریں گے۔