قومی اور صوبائی الیکشن ایکساتھ ہونے چاہئیں۔ رانا ثناءاللہ

اسلام آباد (پاک صحافت) وفاقی وزیر رانا ثناءاللہ کا کہنا ہے کہ قومی اور صوبائی الیکشن ایکساتھ ہونے چاہئیں۔

تفصیلات کے مطابق وفاقی وزیر داخلہ رانا ثناءاللہ نے کہا ہے کہ عمران نیازی 2014ء سے ملک کو بحران کا شکار کرنے میں لگا ہوا ہے، اگر اس کی ضد پر یہ دو صوبائی الیکشن ہو جائیں تو نگراں سیٹ اپ نہیں ہوگا۔ اگر جنرل الیکشن ہو جائیں تو دو صوبوں میں نگراں سیٹ اپ نہیں ہوگا، 5 سال بعد پھر یہی ہوگا، ایسی صورت میں الیکشن متنازع ہوں گے۔

رانا ثناءاللہ کا مزید کہنا تھا کہ اگر یہ ہارے تو ہم پر الزام لگائیں گے کہ نگراں سیٹ اپ نہیں تھا، انہوں نے اثر و رسوخ استعمال کیا، یہ ایسی صورت حال ہے کہ الیکشن کمیشن کو بہتر فیصلہ کرنا چاہیے۔ انہوں نے کہا کہ نیا الیکشن استحکام کا باعث بننا چاہیے نہ کہ نئے دھرنے اور افراتفری کا، شفاف الیکشن میں کوئی چیز حائل ہے تو اس کا تدارک کرنا الیکشن کمیشن کی ذمہ داری ہے، الیکشن کمیشن چاہے تو عدالت میں ریویو میں جاسکتا ہے۔