لاہور (پاک صحافت) حمزہ شہباز کا کہنا ہے کہ فارن فنڈنگ پر پلنے والی جماعت پی ٹی آئی اس وقت پاکستان کی جڑوں کو کھوکھلا کرنے میں مصروف ہے۔
تفصیلات کے مطابق شوکت ترین لیک آڈیو پر سابق وزیراعلی پنجاب حمزہ شہباز شریف نے بیان دیتے ہوئے کہا ہے کہ شوکت ترین کی تیمور جھگڑا اور محسن لغاری کی گفتگو نے مکروہ سازش کا پردہ چاک کردیا ہے۔ آئی ایم ایف پروگرام پاکستان کی معیشت کے لئے اشد ضروری ہے جبکہ عمران نیازی ریاست پاکستان کے اندر انارکی، فتنہ اور فساد چاہتا ہے۔
حمزہ شہباز کا مزید کہنا ہے کہ عمران نیازی کے دور اقتدار میں پاکستان کے سارے دوست ممالک سے تعلقات بدترین ہوگئے، سیلاب جیسے قومی سانحے پر بھی عمران نیازی نے سیاست کی۔ عمران نیازی اور اس کے چیلے پاکستان کو سری لنکا جیسے حالات سے دوچار کروانا چاہتے ہیں، عمران نیازی تو کہتا ہے کہ اگر وہ اقتدار میں نہیں تو ملک پر ایٹم بم مار دو۔ انہوں نے کہا کہ عمران نیازی کے ارد گرد لوگوں کو بھی سوچنا چاہئے کہ وہ پاکستان مخالف کھیل کا حصہ کیوں بن رہے ہیں۔