اسلام آباد (پاک صحافت) نگراں وزیر داخلہ کا کہنا ہے کہ غیر قانونی تارکین وطن سے متعلق پلان کو حتمی شکل دے دی ہے۔
تفصیلات کے مطابق نگران وزیر داخلہ سینیٹر سرفراز بگٹی نے پریس کانفرنس سے خطاب کرتے ہوئے کہا ہے کہ رضاکارانہ طور پر واپس جانے والے تارکین وطن کی حوصلہ افزائی کریں گے لیکن یکم نومبر کے بعد غیرقانونی طور پر پاکستان میں مقیم غیرملکیوں پر سمجھوتہ نہیں کریں گے۔ مختلف شہروں میں سینٹرز بنائے گئے جہاں غیر قانونی مقیم تارکین وطن کو رکھا جائے گا۔
سرفراز بگٹی کا مزید کہنا تھا کہ ہم نے غیرملکیوں سے متعلق جیو فینسنگ کرلی ہے، ہمیں معلوم ہے کہ غیرقانونی تارکین وطن کس گاوں اور کس شہر میں ہیں، کوئی بھی غیرقانونی مقیم افراد کو پناہ دے گا سختی سے نمٹیں گے۔ مہم غیرقانونی مہاجرین سے متعلق ہے قانونی دائرے میں آنے والوں کا مسئلہ نہیں ہے، ویزا لے کر پاکستان آئیں ہم مہمان نوازی کریں گے ہم مہمان نواز ہیں۔
انہوں نے کہا کہ ملک میں سیاسی قیادت کو ٹھریٹس موجود ہیں، وقت آئے گا کہ اس ملک میں ایک بھی غیرقانونی غیرملکی نہیں ہوگا۔ ایک سوال کے جواب میں انہوں نے کہا کہ ناممکن ہے کہ کوئی ڈالر یہاں سے اسمگلنگ کرکے لے جائے، افغان مہاجرین فی خاندان واپسی پر 50 ہزار روپے تک کی افغان کرنسی لے جاسکیں گے۔