لاہور (پاک صحافت) مریم نواز کا کہنا ہے کہ عید الاضحی پر کسی کو قانون ہاتھ میں لینے کی اجازت نہیں دیں گے۔
تفصیلات کے مطابق وزیراعلی پنجاب مریم نواز کی زیر صدارت خصوصی اجلاس ہوا، جس میں عید الاضحی کے انتظامات اور سیکیورٹی کا جائزہ لیا گیا۔ اجلاس میں صوبے میں جانوروں کی آلائشیں نہروں اور نالوں میں پھینکنے پر پابندی عائد کردی گئی جبکہ سری پائے بھوننے کے غیر قانونی کاروبار پر دفعہ 144 کے تحت پابندی بھی عائد کردی گئی۔
ذرائع کے مطابق وزیراعلی پنجاب مریم نواز نے صوبائی، ڈویژنل، ضلعی اور تحصیل لیول کنٹرول روم مزید فعال کرنے کا حکم دے دیا۔ انہوں نے عید گاہوں میں گرمی کے پیش نظر مسٹ فین اور پنکھے لگانے کی ہدایت دی اور کہا کہ نگرانی کے لیے کیمرے اور چیکنگ کے لئے واک تھرو گیٹس نصب ہوں گے۔
وزیراعلی پنجاب نے پارکس میں بچوں کے لیے جھولوں اور سلائیڈز کی انسپکشن کا بھی حکم دیتے ہوئے کہا کہ پارکوں میں نصب جھولوں کی باقاعدہ چیکنگ کی جائے اور حفاظتی معیار کو یقینی بنایا جائے، جہاں اندیشہ ہو سیکیورٹی بڑھائیں، عوام کے جان ومال کا تحفظ ہر صورت یقینی بنایا جائے گا، کسی کو قانون ہاتھ میں لینے کی ہر گز اجازت نہیں دیں گے۔
انہوں نے مزید کہا کہ لاؤڈ اسپیکر کے غیرقانونی استعمال اور اسلحہ نمائش پر پابندی یقینی بنائی جائے، مویشی منڈیوں، بازاروں اور مارکیٹوں کی سیکیورٹی کے لیے فول پروف انتظامات کیے جائیں اور مویشی منڈیوں میں صفائی، شیڈ، پینے کے صاف پانی کی فراہمی اور اسپرے بھی کیا جائے۔