اسلام آباد (پاک صحافت) وفاقی وزیر امور کشمیر و گلگت بلتستان امیر امقام نے کہا ہے کہ عوام نے پی ٹی آئی کا احتجاج مسترد کردیا۔
تفصیلات کے مطابق صوبائی دارالحکومت میں امیرمقام نے پریس کانفرنس کرتے ہوئے کہا ہے کہ شرپسند ٹولہ ملک میں انتشار پھیلانا چاہتا ہے، احتجاج سے لوگوں کا کاروبار متاثر ہوا ہے، عوام اور تاجر دونوں پریشان ہیں۔
انہوں نے کہا کہ کرم میں خون کی ہولی کھیلی جاری رہی ہے، وزیراعلی خیبرپختونخوا علی امین گنڈاپور کی کوئی ترجیحات نہیں، خیبرپختونخوا میں امن و امان کی صورتحال مخدوش ہے، عوام نے تحریک انصاف کی احتجاج کی کال کو مسترد کردیا ہے۔
امیر مقام کا کہنا تھا کہ اسلام آباد پر چڑھائی سے بانی پی ٹی آئی رہا نہیں ہوں گے، احتجاج کی کال سے ملک کا نقصان ہوتا ہے، یہ کال پی ٹی آئی کے خاتمے کی کال ثابت ہوگی۔
وفاقی وزیر کا مزید کہنا تھا کہ احتجاج میں خیبرپختونخوا کے سرکاری وسائل کو استعمال کیا جارہا ہے، بشری بی بی نے دوست ملک کےخلاف بیان دیا، پاکستان کے معاشی حالات بہتر ہورہے ہیں۔