عمران خان کا ٹھکانہ اڈیالہ جیل یا پاگل خانہ ہے۔ ناصر حسین شاہ

کراچی (پاک صحافت) پیپلزپارٹی کے رہنما ناصر حسین شاہ کا کہنا ہے کہ عمران خان کا ٹھکانہ اڈیالہ جیل یا پاگل خانہ ہے۔

تفصیلات کے مطابق وزیر بلدیات سندھ سید ناصر حسین شاہ نے پریس کانفرنس سے خطاب کرتے ہوئے کہا ہے کہ جب ادارے نیوٹرل ہو رہے ہیں تو یہ چاہتے ہیں کہ ادارے نیوٹرل نہ ہوں۔ یہ اداروں اور ملک کو بدنام کرتے ہیں، ڈکٹیٹرز کی اولاد اور مشرف کی ٹیم ان کے ساتھ ہے، اسی لیے مارشل لاء کا خواب دیکھتے ہیں۔

ناصر حسین شاہ کا مزید کہنا تھا کہ یہ حصولِ اقتدار کے لیے سب کچھ کر رہے ہیں، عمران خان کا ٹھکانہ اڈیالہ جیل یا پاگل خانہ ہے۔ گورنر سندھ کامران ٹیسوری کے پیر پگارا سے پرانے مراسم ہیں، پیر پگارا ایک اہم شخصیت ہیں، ان سے ملنا کوئی بری بات نہیں ہے۔ انہوں نے کہا کہ کہ پی ٹی آئی کے لانگ مارچ میں صحافی خاتون کے حادثے والے واقعے کی مذمت کرتے ہیں۔