اسلام آباد (پاک صحافت) مریم نواز کا کہنا ہے کہ عمران خان پاکستان کا واحد وزیراعظم ہے جسے پارلیمنٹ نے نکالا ہے۔
تفصیلات کے مطابق مسلم لیگ ن کی سینیئر نائب صدر مریم نواز نے ذرائع ابلاغ کے نمائندوں سے گفتگو کرتے ہوئے کہا ہے کہ ذمہ داری ملنے کے بعد مجھے فوری واپس جانے کا کہا گیا، سب کی مشاورت کے بعد میاں صاحب نے میرے کنونشن کا پلان ترتیب دیا، حکومت میں آنے کے بعد ہم نے ون سائیڈڈ میدان چھوڑ دیا ہے۔ اپوزیشن کے دور میں بڑے متحرک رہے ہیں، میاں صاحب کے موجود نہ ہونے سے جماعت کی کاکردگی متاثر ہورہی ہے، مجھے میری توقعات سے بہتر رسپانس ملا ہے اور رسپانس کا اصل پیمانہ عوام کا جذبہ ہوتا ہے۔
مریم نواز کا مزید کہنا تھا کہ ہم نے چار پانچ سال الزام بھگتا، میرے خیال میں مقدمہ بناتے ہوئے انہوں نے نہیں سوچا یہ کیس کھلی عدالت میں چلے گا، مجھ پر لگائے گئے الزامات کہاں ہیں؟ مجھے نااہل کیا گیا لیکن میں اہل ہوگئی، بابا رحمت بابا زحمت بن گیا، (ن) لیگ پر بچوں والے جھوٹے مقدمات بنائے گئے۔ ہفتے میں 6 دن ہماری نیب میں پیشی ہوتی تھی لیکن یہاں جس دن ان کی پیشی ہو پلاسٹر والی تصویر آجاتی ہے، انہیں چاہیے کہ وہیل چیئر پکڑیں اور عدالت میں پیش ہوں۔ عمران خان حکومت پر انہوں نے کہا کہ ایک طرف جنرل فیض اور دوسری طرف بابا رحمت لگا ہوا تھا، عدلیہ ابھی انہیں کھلی چھوٹ دے رہی ہے، اگر عدالتوں میں پیشیوں پر ہم بہانے کرتے تو یہ ہی رویہ ہوتا؟ عمران کے ساتھ ایک سلوک اور ہمارے ساتھ دوسرا سلوک کیا گیا۔ مریم نواز نے کہا کہ آئی ایم ایف سے ہم نے کوئی معاہدہ نہیں کیا عمران خان کی معاہدے کی خلاف ورزی کے باعث آئی ایم ایف کی شرائط مزید سخت ہوگئیں، آئی ایم ایف کی شرائط پورا نہ کریں گے تو ڈیفالٹ ہوجائیں گے اور بہت سے لوگوں کی خواہش ہے کہ ملک ڈیفالٹ کرے۔