اسلام آباد (پاک صحافت) عرفان صدیقی کا کہنا ہے کہ عمران خان بہادر بنیں اور کہہ دیں میں نے پارٹی کو فوج سے لڑایا۔
تفصیلات کے مطابق سینیٹ میں پاکستان مسلم لیگ (ن) کے پارلیمانی پارٹی لیڈر اور خارجہ امور کمیٹی کے سربراہ سینیٹر عرفان صدیقی نے کہا ہے کہ آرمی چیف کے حضور عرضیاں گذارنے والے بانی چیئرمین بہادر بنیں، اعصاب جواب دے گئے ہیں تو پورا سچ بھی اگل دیں، الزام دوسروں کے سر تھوپنے کے بجائے مردانگی کا مظاہرہ کریں، کہہ ڈالیں کہ ہاں پی ٹی آئی کو فوج سے میں نے لڑایا۔
عرفان صدیقی کا مزید کہنا تھا کہ بانی پی ٹی آئی کہہ ڈالیں کہ جنرل عاصم منیر کی تقرری روکنے کے لئے پنڈی پر یلغار انہوں نے کی، کہہ ڈالیں کہ کبھی خود کبھی بیگم پر قاتلانہ حملوں کے الزامات انہوں نے لگائے۔ بانی پی ٹی آئی کہہ ڈالیں کہ میں نے 9 مئی کو عاصم منیر کا تختہ الٹنے کیلئے فوج میں بغاوت کی سازش کی، 200 سے زیادہ فوجی تنصیبات، شہدا کی یادگاروں پر حملے میں نے کرائے۔
انہوں نے کہا کہ بانی پی ٹی آئی کہہ ڈالیں کہ فضائیہ کے طیارے میں نے جلائے، ہیلی کاپٹر حادثے کے شہدا کا مضحکہ میں نے اڑایا، سوشل میڈیا سے عاصم منیر اور فوج کو گالیاں میں نے دلوائیں، بیرون ملک اپنی فوج اور چیف کے خلاف بسوں پر اشتہاری مہم میں نے چلوائی، عاصم منیر کو اس عہد کا یحیی خان باور کرانے والی ویڈیو میں نے بنوائی، جیل میں بیٹھ کر فوج اور چیف کے خلاف مضمون میں لکھ رہا ہوں۔