کراچی (پاک صحافت) پاکستان پیپلز پارٹی کے رہنماء اور وزیر اطلاعات سندھ شرجیل انعام میمن نے کہا ہے کہ کوئی عقلمند انسان عظمی بخاری جیسا بیان نہیں دے سکتا، اگر عظمی بخاری کو پیپلز پارٹی کے ساتھ کوئی مسئلہ ہے تو بیٹھ کر حل کریں نہ کہ غلط بیانات دیں۔
تفصیلات کے مطابق میڈیا سے گفتگو کرتے ہوئے شرجیل میمن نے کہا ہے کہ ن لیگ میں کچھ نا سمجھ لوگ ہیں جو آئین پڑھتے نہیں اور بیان دے دیتے ہیں، پروپیگنڈا وہ لوگ کر رہے ہیں جو کل کالا باغ ڈیم کی حمایت میں ریلیاں نکال رہے تھے، حکومت چھوڑنا بڑی بات نہیں، حالات اوروقت کے مطابق فیصلے کرنے ہوتے ہیں، کالاباغ ڈیم کو صدر زرداری نے دفن کیا۔
شرجیل میمن کا مزید کہنا تھا کہ چیئرمین بلاول بھٹو نے واضح الفاظ میں کہا ہے کہ میں عوام کے ساتھ کھڑا ہوں نہ کہ شہباز شریف کے ساتھ، پیپلز پارٹی نے کہا تھا کہ پی ٹی آئی سے بات کرنے کو تیار ہیں لیکن پی ٹی آئی نے منع کر دیا۔ پیپلز پارٹی چاہتی ہے کہ تمام صوبے مل کر چلیں اور کام ہو، مشکل حالات میں پیپلز پارٹی نے ملک کو مضبوط کیا، شہید بھٹو، شہید بی بی، صدر آصف علی زرداری نے ہمیشہ پاکستان کو مضبوط کیا۔
وزیر اطلاعات سندھ نے کہا کہ سی سی آئی کے ذریعے وزیر اعلیٰ کئی باروفاقی حکومت کو خط لکھ چکے ہیں، ہم متعدد بار واضح کر چکے ہیں کہ کینالز کے معاملے پر کوئی سمجھوتہ نہیں ہوگا، پارٹی نے کینالز کی کھل کر مخالفت کی ہے، وفاقی حکومت کے ساتھ مذاکرات چل رہے ہیں۔