اسلام آباد (پاک صحافت) عراق کے سفیر حامد عباس لفتہ کی وزیر داخلہ محسن نقوی اور وفاقی وزیر چودھری سالک حسین سے ملاقات ہوئی ہے، ملاقات میں عراق جانے والے زائرین کو سہولتیں فراہم کرنے سے متعلق اقدامات پر تبادلہ خیال کیا گیا۔
تفصیلات کے مطابق ملاقات میں زائرین کو بغیر فیس انٹری ویزا کی اجازت دینے اور پاکستانی زائرین کا کوٹہ بڑھانے سے متعلق امور پر گفتگو ہوئی، وزیر داخلہ نے زائرین سے زائد فیس وصول کرنے والے ٹریول ایجنٹس کے خلاف کارروائی کی یقین دہانی کرائی۔
ذرائع کے مطابق عراقی سفیر نے ٹریول ایجنٹس کی فہرست فراہم کی جنہوں نے زائرین سے غیرقانونی زائد فیس وصول کی، محسن نقوی نے کہا کہ ان ٹریول ایجنٹس کے خلاف ایک ہفتے میں کارروائی یقینی بنائی جائے گی۔
ملاقات میں وزارت سمندر پار پاکستانی اور عراق کی وزارت لیبر کے درمیان ایم او یو پر دستخط کرنے پر اتفاق کیا گیا، سالک حسین نے کہا کہ ایم او یو کے فعال ہونے سے پاکستانیوں کو عراق کیلئے ورک پرمٹ حاصل کرنا آسان ہوگا، ایم او یو سے قانونی امیگریشن بڑھے گی، غیرقانونی طریقوں سے داخلہ اور رہائش میں کمی ہوگی۔