لاہور (پاک صحافت) صدر مملکت آصف علی زرداری سے پیپلز پارٹی کے پارلیمانی وفد کی ملاقات کی اندرونی کہانی سامنے آگئی۔
تفصیلات کے مطابق صدر مملکت آصف علی زرداری سے پنجاب کی پارلیمانی وفد کے اراکین اور تنظیمی رہنماؤں نے گورنر ہاؤس لاہور میں مرحلہ وار ملاقاتیں کیں، پیپلز پارٹی پارلیمانی وفد اور رہنماؤں نے آصف علی زرداری کے سامنے شکایات کے انبار لگا دیے۔ وفد کے اراکین کا کہنا تھا کہ انتظامی معاملات میں پیپلز پارٹی کے اراکین کو نظر انداز کیا جاتا ہے، ترقیاتی فنڈز کی تقسیم کے معاملہ میں بھی ترجیح نہیں دی جا رہی ہے جبکہ پیپلز پارٹی کے پارلیمانی وفد نے حلقوں کے مسائل پر بھی آگاہ کیا۔
ذرائع کے مطابق اس موقع پر صدر مملکت آصف علی زرداری نے کہا کہ اتحادی حکومت کے ساتھ چلنا ہماری مجبوری ہے، جانتا ہوں کہ تحریری معاہدے کے نکات پر عملدرآمد نہیں ہو رہا ہے، پیپلز پارٹی پارلیمانی ارکان آئندہ بجٹ آنے تک مسائل حل ہونے کا انتظار کریں۔
بعد ازاں صدر مملکت آصف زرداری پارٹی رہنماؤں سے ملاقات کے بعد گورنر ہاؤس سے روانہ ہوگئے۔