صدر عارف علوی کو مستعفی ہوکر گھر چلے جانا چاہئے۔ عرفان صدیقی

اسلام آباد (پاک صحافت) عرفان صدیقی کا کہنا ہے کہ صدر عارف علوی کو مستعفی ہوکر گھر چلے جانا چاہئے۔

تفصیلات کے مطابق مسلم لیگ (ن) کے سینیٹر عرفان صدیقی نے کہا ہے کہ اگر صدر عارف علوی کا سٹاف بھی ان کے بس میں نہیں تو مستعفی ہو کر گھر چلے جائیں۔ اب صدر مملکت فیصلہ کریں کہ وہ عہدے پر رہیں گے یا گھر جائیں گے۔

عرفان صدیقی کا مزید کہنا تھا کہ صدر مملکت ڈاکٹر علوی کھل کر بتائیں، اگر بلوں سے اختلاف تھا تو اعتراضات درج کیوں نہیں کیے؟ ہاں یا ناں کے بغیر بل واپس بھیجنے کا کیا مقصد تھا؟۔

انہوں نے کہا کہ میڈیا پر خبریں آنے کے باوجود وہ دو دن کیوں چپ رہے؟ صدر مملکت اس معاملے پر جب بولے بھی تو معاملہ اور الجھا دیا۔