لاہور (پاک صحافت) پاکستان مسلم لیگ ن کے صدر و قومی اسمبلی میں قائد حزب اختلاف شہباز شریف نے غزہ پر اسرائیلی حملوں کی سخت الفاظ میں مذمت کرتے ہوئے فلسطینیوں کی شہادت پر رنج و غم کا اظہار کیا، انہوں نے مطالبہ کیا ہےکہ عالمی برادری، او آئی سی اور عرب لیگ اسرائیل کو ظلم و بربریت سے روکنے کے لیے فوری کردار ادا کریں۔
تفصیلات کے مطابق قومی اسمبلی میں اپوزیشن لیڈر شہباز شریف نےفلسطینیوں سے اظہار ہمدردری کرتے ہوئے عالمی برادری سے مطالبہ کیا کہ اسلامی ممالک کا سربراہی اجلاس بلایا جائے اور فلسطینیوں کے قتل عام کو رکوایا جائے۔صدر مسلم لیگ ن کا کہنا تھا کہ اسرائیل پورے فلسطین کو قبرستان بنانے پر تلا ہوا ہے، اسرائیلی ظلم نہ روکا گیا تو پورا خطہ اور دنیا تباہی و بربادی کی جہنم میں جاگرے گی۔
واضح رہے کہ مسلم لیگ ن کے صدر شہباز شریف کا مزید کہنا تھا کہ فلسطینی بے گناہ خواتین اور شہید بچے پوری انسانیت سے انصاف کا سوال کر رہے ہیں، یورپی یونین سمیت تمام مہذب دنیا کے بیانات کافی نہیں، بے گناہوں کو بچانے کے لیے عملی قدم اٹھانا ہو گا۔ اسرائیل کی انسانیت سوز کارروائی نے مسلمانوں کی عیدالفطر کو غم میں بدل دیا ہے، فلسطینی شہداء کے اہل خانہ سے تعزیت اور ہمدردی کرتے ہیں۔