لاہور (پاک صحافت) پاکستان مسلم لیگ پنجاب کی ترجمان عظمیٰ بخاری نے ملک میں چینی کی بڑھتی قیمت پر ردعمل کا اظہار کرتے ہوئے کہا ہے کہ شوگر مافیا کی سرپرستی عمران خان خود کر رہے ہیں۔ انہوں نے کہا کہ عمران خان نے جس دن شوگرمافیا کےخلاف ایکشن لیا وہ دن حکومت کا آخری دن ہوگا۔ عمران خان کی وجہ سے شوگر مافیا آج پاکستان کا طاقتور مافیا بن چکا ہے۔
تفصیلات کے مطابق ملک میں چینی کی بڑھتی قیمت سے متعلق گفتگو کرتے ہوئے ن لیگ پنجاب کی ترجمان عظمیٰ بخاری نے پی ٹی آئی حکومت کو سخت تنقید کا نشانہ بنایا، انہوں نے کہا کہ چھ ماہ پہلے اسلام آباد ہائیکورٹ نے حکم دیا چینی 70 روپے فروخت کی جائے، حکومت نے اس عدالتی حکم پر بھی عمل نہیں کرایا۔ انہوں نے یہ بھی کہا کہ عدلیہ کے احکامات اور شوکت ترین کو کسی نے سنجیدہ نہ لیا۔
واضح رہے کہ عظمیٰ بخاری نے وفاقی حکومت کو آڑے ہاتھوں لیتے ہوئے کہا کہ حکومت اپنے کمیشن اور عدالتی احکامات پر بھی عملدرآمد کرانے کے قابل نہیں ہے۔ عظمیٰ بخاری کا کہنا ہے کہ شوگر ملز ایسوسی ایشن کے پاس 4 دن کا اسٹاک ہے، لگتا ہے باقی ذخیرہ عثمان بزدار، اسلم اقبال اور حسان خاور کے دفاتر میں ہوگا۔