بنوں (پاک صحافت) لکی مروت میں انٹیلی جنس بیسڈ آپریشن میں کالعدم تحریک طالبان پاکستان کا ایک اہم دہشت گرد کمانڈر ہلاک کر دیا گیا۔
تفصیلات کے مطابق بنوں کے کاؤنٹر ٹیررازم ڈپارٹمنٹ نے یہ آپریشن اتوار کو کیا جس میں اہم کمانڈر کی ہلاکت کی اطلاع ملی ہے ۔ آپریشن ملنگ اڈہ کے قریب تاجوری روڈ پر کیا گیا جس کے بعد وہاں چھپے مسلح دہشت گردوں نے پولیس پر فائرنگ کردی۔
سی ٹی ڈی کی جوابی فائرنگ میں اہم ٹی ٹی پی کمانڈر ولی اللہ مارا گیا، جبکہ دیگر موقع سے فرار ہونے میں کامیاب ہوگئے۔ ہلاک دہشت گرد بچکان احمد زئی ضلع لکی مروت کا رہائشی تھا۔ سی ٹی ڈی نے اس کے قبضے سے اسلحہ اور دو دستی بم برآمد کر لیے۔
ولی کالعدم ٹی ٹی پی ٹیپو گل گروپ کا مقامی کمانڈر تھا اور کمانڈر عتیق الرحمان عرف ٹیپو گل مروت کا داماد تھا۔ وہ سی ٹی ڈی بنوں، ڈی آئی خان اور مقامی پولیس پر بم دھماکوں اور پولیس اور سیکیورٹی فورسز پر حملوں کے متعدد مقدمات میں مطلوب تھا۔