راولپنڈی (پاک صحافت) آرمی چیف جنرل قمر جاوید باجوہ کا کہنا ہے کہ سیلاب متاثرین کی دادرسی تک آرام سے نہیں بیٹھیں گے، تمام تر وسائل بروئے کار لاکر متاثرین کی مدد کریں گے۔
پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق پاک فوج کے سربراہ جنرل قمر جاوید باجوہ نے بلوچستان کے سیلاب متاثرہ علاقوں کا دورہ کر کے متاثرہ لوگوں سے ملاقات کی اور مصافحہ کیا۔ اس دورے کے دوران آرمی چیف نے امدادی کاموں میں مصروف جوانوں سے ملاقات کی اور ان کی کاوشوں کو بھی سراہا۔
آرمی چیف کا اس موقع پر کہنا تھا کہ ہم ایک بھی سیلاب متاثرہ شخص تک پہنچے بغیر چین سے نہیں بیٹھیں گے اور ہر ایک شخص کی بحالی یقینی بنائیں گے۔ بارش و سیلاب متاثرین کی حفاظت و بہبود پہلی ترجیح ہے، ہم ہر سیلاب متاثرہ فرد تک پہنچیں گے اور متاثرین کی دادرسی تک آرام سے نہیں بیٹھیں گے۔ انہوں نے کہا کہ ہم امدادی کاموں کے ساتھ بحالی کو یقینی بنائیں گے کیونکہ پاکستان کی عوام اولین ترجیح ہیں، مشکل کی اس گھڑی میں عوام کو تنہا نہیں چھوڑیں گے۔ آرمی چیف نے تمام دستیاب وسائل بروئے کار لانے کی ہدایت کرتے ہوئے کہا کہ ریسکیو، ریلیف اور بحالی کیلئے سول انتظامیہ کی بھرپور مدد کی جائے۔