اسلام آباد (پاک صحافت) مریم اورنگزیب کا کہنا ہے کہ سیاست میں مکمل ناکامی نے عمران خان کو ذہنی مریض بنا دیا ہے۔
تفصیلات کے مطابق وفاقی وزیر اطلاعات و نشریات مریم اورنگزیب نے ایک بیان جاری کرتے ہوئے کہا ہے کہ عمران خان ذہنی مریض ہوچکے ہیں، عوام نے ان کا چور، چور، چور کا جھوٹا بیانیہ سننا بند کردیا ہے۔ آج عمران خان کا خطاب سننے کیلئے کالجوں میں طلبہ کو زبردستی بٹھایا گیا، پنجاب حکومت اختیارات کا ناجائز استعمال کرکے درسگاہوں کو سیاسی اکھاڑہ بنا رہی ہے۔
مریم اورنگزیب کا مزید کہنا ہے کہ توشہ خانہ اوپن اینڈ شٹ کیس ہے، یہ صرف گھڑیوں کی خرید کا نہیں، اربوں روپے کے ٹیکس ڈکلیئر نہ کرنے کا معاملہ ہے، دوسروں سے 40 سال کا حساب مانگنے والے کو اپنے 4 سال کا حساب دینا ہوگا۔