سرگودھا (پاک صحافت) سابق وزیراعظم و پیپلز پارٹی کے مرکزی رہنما راجہ پرویز اشرف نے کہا کہ سیاست میں عدم برداشت کی صورتحال درست نہیں، جمہوری عمل میں اخوت اور بھائی چارے کی فضا کی ضرورت ہے۔
تفصیلات کے مطابق میڈیا سے بات چیت کرتے ہوئے راجہ پرویز اشرف نے کہا ہے کہ پنجاب کی کارکردگی سے ہم خوفزدہ نہیں، مریم نواز اچھا کام کرے گی تو ہم تعریف کریں گے، ہم ان کے اتحادی ہیں، سیاست میں چھوٹی بڑی باتیں چلتی ہیں۔ بھٹو کیس میں عدالتی فیصلہ کا کریڈٹ صدر آصف علی زرداری کو جاتا ہے، 45 سال بعد اگر بھٹو کو انصاف مل رہا ہے تو اس سے تاریخ درست ہوگی، اس میں توسیع ہوگی۔
راجہ پرویز اشرف کا مزید کہنا تھا کہ بھٹو کا پورا خاندان شہید کر دیا گیا، اگر ایسا نہ ہوتا تو آج پاکستان بہت آگے بڑھ چکا ہوتا، بانی پی ٹی آئی اداروں کو خطوط لکھنے کی بجائے مثبت جمہوری انداز اپنائیں۔
انہوں نے کہا کہ دہشت گردی ایک بہت بڑا خوفناک المیہ ہے جس نے پاکستان کو نقصان پہنچایا، اللہ کرے ہم جلد دہشت گردی سے جان چھڑوا لیں، پاکستانی فوج اور سویلین نے دہشت گردی کیخلاف بڑی قربانیاں دی ہیں۔