کراچی (پاک صحافت) بدترین لوڈ شیڈنگ اورمہنگی بجلی کے ستائے ہوئے سندھ کے شہریوں کے لیے اچھی خبر ہے کہ 100 یونٹ تک کے صارفین کو مفت بجلی دینے کا پلان تیار ہوگیا۔
تفصیلات کے مطابق وزیر توانائی سندھ ناصر حسین شاہ نے میڈیا سے گفتگو کرتے ہوئے کہا ہے کہ سولر پارک اور منی گرڈ اسٹیشن سے پہلے مرحلے میں عوام کو 100 یونٹ تک مفت بجلی دیں گے، حکومت نے بجٹ میں سولر انرجی اور منی گرڈ کے لئے رقم مختص کردی، سندھ حکومت بجٹ میں سولر انرجی کے لیے ابتدائی طور پر 5 ارب روپے رکھے گی۔
ناصر حسین شاہ کا مزید کہنا تھا کہ بجٹ میں سولر پینل انتہائی رعایتی قیمت پر دینے کی اسکیم لارہے ہیں، غریب اور متوسط طبقے کو 2 لاکھ سولر پینلز دیے جائیں گے، سولر پینلز کی قیمت کا 80 فیصد حکومت اور صرف 20 فیصد عوام سے لیا جائے گا۔
انہوں نے کہا کہ صوبے میں 5 لاکھ ایسے گھر ہیں جہاں سرے سے بجلی ہی موجود نہیں، کراچی سمیت سندھ میں سولر پارک اور منی گرڈ سٹیشن لگائیں گے۔