سفارتی مشن پر حملے کے ملزم جرمنی پولیس پاکستان کے حوالے نہیں کررہی۔ دفتر خارجہ

اسلام آباد (پاک صحافت) دفتر خارجہ کا کہنا ہے کہ سفارتی مشن پر حملے کے ملزم جرمنی پولیس پاکستان کے حوالے نہیں کر رہی۔

تفصیلات کے مطابق دفتر خارجہ نے ان خبروں کو یکسر بے بنیاد قرار دیا ہے کہ جرمن شہر فرینکفرٹ میں واقع پاکستانی سفارتی مشن پر حملے میں ملوث افراد کو پاکستان کے حوالے کیا جارہا ہے۔

ایک بیان میں ترجمان دفترِ خارجہ نے کہا ہے کہ گزشتہ ہفتے فرینکفرٹ میں پاکستانی قونصل خانے پر حملے میں ملوث افراد کے خلاف کارروائی کرتے ہوئے جرمن پولیس نے دو ملزم گرفتار کیے تھے۔

ترجمان دفتر خارجہ کا مزید کہنا ہے کہ جرمن پولیس گرفتار کیے گئے افراد سے پوچھ گچھ کر رہی ہے اور حملے کے مقاصد کا تعین کیا جارہا ہے تاہم ابھی تک ایسی کوئی اطلاع نہیں ملی کہ جرمن حکومت انہیں پاکستان کے حوالے کر رہی ہے یا ایسا کرنے کا ارادہ رکھتی ہے۔