لاہور (پاک صحافت) عظمی بخاری کا کہنا ہے کہ سرٹیفکیٹ شدہ چور، کرپٹ اور نالائق اب ہمیں کرپشن پر لیکچر دیں گے۔
تفصیلات کے مطابق صوبائی وزیر اطلاعات پنجاب عظمی بخاری نے بیرسٹر سیف کے بیان پر ردعمل دیتے ہوئے کہا ہے کہ مریم نواز نے آتے ہی تمام سرکاری اسپتالوں میں مفت ادویات شروع کیں جو آپ کی سابقہ حکومت نے بند کردیں تھیں۔ مریم نواز نے تمام سرکاری اسپتالوں کی ری ویمپنگ کا پروگرام شروع کیا ہوا ہے، ہمیں گڈ گورننس پر لیکچر دینے سے پہلے اپنے صوبے کے اسپتالوں اور تعلیمی اداروں پر غور کریں۔
وزیراطلاعات پنجاب عظمی بخاری کا مزید کہنا تھا کہ خیبرپختونخواہ میں لوگوں کو تعلیم اور صحت کی بجائے ریاست مخالف بیانیہ دیے جارہے ہیں، کالجز اور یونیورسٹی کے طلباء کو تشدد اور نفرت پر اکسایا جارہا ہے نوجوان نسل کو بغاوت پر اکسانے والا آج اڈیالہ جیل میں بیٹھا ہے یہ باقیوں کے لیے سبق ہے۔
انہوں نے کہا کہ اللہ کی شان ہے سرٹیفکیٹ شدہ چور، کرپٹ اور نالائق اب ہمیں کرپشن پر لیکچر دیں گے، جن کے اپنے صوبے میں اسپتال، یونیورسٹیاں اور کالجز فنڈز کی عدم دستیابی سے بند ہورہے ہیں، ان کو لاہور کے اسپتالوں کی فکر پڑی ہے، خیبرپختونخواہ میں فنڈز نہ ہونے کے باعث یونیورسٹیاں بند ہورہی ہیں۔