اسلام آباد (پاک صحافت) وزیر مملکت طلال چوہدری نے کہا ہے کہ دہشت گرد ٹرین مسافروں کو ڈھال کے طور پر استعمال کر رہے ہیں۔
تفصیلات کے مطابق طلال چوہدری نے کہا کہ بولان میں ٹنل کے قریب جعفر ایکسپریس پر حملہ کیا گیا۔ دہشت گرد بہت سارے لوگوں کو ٹرین سے پہاڑی علاقے میں لے کر گئے ہیں، خواتین اور بچوں کو ڈھال بنایا گیا ہے، جس کی وجہ سے سیکیورٹی فورسز احتیاط کر رہی ہیں۔
طلال چوہدری کا مزید کہنا ہے کہ سیکیورٹی فورسز نے پہنچ کر ٹرین سے بہت سارے لوگوں کو ریسکیو کرلیا، دہشت گرد مسافروں کو ڈھال کے طور پر استعمال کر رہے ہیں۔ ٹرین میں سرکاری ملازمین بھی اہل خانہ کے ساتھ سفر کر رہے تھے، سیکیورٹی فورسز بھرپور آپریشن کر رہی ہیں جلد تمام لوگوں کو بازیاب کروایا جائے گا۔
انہوں نے کہا کہ دہشت گردوں نے مسافروں کو نہیں چھوڑا، ان مسافروں کو سیکیورٹی فورسز نے بازیاب کروایا، دہشت گردی کے خلاف جنگ میں پوری دنیا کو ہمارے ساتھ کھڑا ہونا ہوگا۔ بدقسمتی سے ایسے واقعات کو سوشل میڈیا پر دشمن کے ساتھ اپنے لوگ بھی سپورٹ دے رہے ہیں۔