کوئٹہ (پاک صحافت) وزیراعلی بلوچستان میر سرفراز بگٹی نے کہا ہے کہ صوبے میں دہشتگردوں کے خلاف ٹارگٹڈ آپریشن کرنے جارہے ہیں۔
تفصیلات کے مطابق پریس کانفرنس کرتے ہوئے سرفراز بگٹی نے کہا ہے کہ لوگوں کو قتل کرنے والوں کے خلاف آپریشن کے سوا کوئی آپشن نہیں، 10 سالہ مصور خان کے اغوا پر افسوس ہوا۔ آپریشن کی مخالفت کرنے والی سیاسی جماعتیں دہشتگردی کے خلاف حل بتائیں، کیونکہ کوئی بھی حکومت ہو وہ یہ نہیں چاہے گی کہ یہاں سے بچے اغوا ہوں، بچوں کو اغوا کرنے والوں کے خلاف کارروائی کی جائے گی۔
ایک سوال کے جواب میں وزیراعلی بلوچستان کا کہنا تھا کہ جب تک موقع ہے بلوچستان کے عوام کی خدمت کروں گا، انہوں نے وزیراعلی کی تبدیلی کے حوالے سے پوچھے گئے سوال کا جواب دینے سے گریز کیا اور کہا کہ اس پر کوئی تبصرہ نہیں کروں گا۔
واضح رہے کہ کچھ روز قبل نیشنل ایکشن پلان کی ایپکس کمیٹی نے بلوچستان میں دہشتگرد تنظیموں کے خلاف فوجی آپریشن کی منظوری دی تھی۔