لاہور (پاک صحافت) وزیر اعلی پنجاب مریم نواز نے عید الفطر کے موقع پر اپنے پیغام میں اہل پاکستان کو عید الفطر کی مبارکباد دی ہے۔
تفصیلات کے مطابق وزیراعلی مریم نواز نے کہا ہے کہ اللہ تعالی سے یوم عید پر ہر فرد کی خوشی کے لیے دعا گو ہوں۔ دلی دعا ہے کہ ارض پاک پر اترنے والی خوشیوں کو کبھی زوال نہ آئے۔ عیدالفطر ہر مسلمان کے لیے یوم تشکر اور اللہ تعالی کا انعام ہے۔ ہوسکتا ہے کہ آپ کے احساس اور ایثار سے کسی چہرے پر مسکراہٹ آجائے۔ عید تو تب ہی عید کہلائے گی جب سب باہم شریک ہوں گے۔
ذرائع کے مطابق وزیراعلی مریم نواز نے مزید کہا کہ عیدالفطر احساس او رایثار کا نام ہے۔ عیدالفطر پر یتامی اور مساکین کا احساس اور دلجوئی کرنا سنت نبویؐ ہے۔ عید کے موقع پر یتیم بچوں کے ساتھ حضور نبی کریم ﷺکا شفقت بھرا سلوک احساس کی ابدی مثال ہے۔ عیدالفطر کے موقع پر نادار لوگوں کی ضرورتوں کو جان کر مدد کرنا مستحسن اور مقبول عمل ہے۔
انہوں نے کہا کہ عید کی خوشیاں چھوٹے ملازمین کو شریک کرنے سے دوبالا ہو جاتی ہیں۔ یوم عید پر وطن عزیز کے لیے جانوں کے نذرانے پیش کرنے والوں کو بھی یاد رکھنا چاہیے۔ عید الفطر کے روز شہداء کے خاندانوں کو بھی یاد رکھا جائے۔ عید صرف اپنے لیے خوشی منانے کا نام نہیں بلکہ دوسروں کی مدد کرنے والے زیادہ سکون اورخوشیاں پاتے ہیں ۔
وزیراعلی پنجاب نے کہا کہ اللہ تعالی نے ہمیں جتنی نعمتو ں سے نوازا ہے اسی کے مطابق دوسروں کی مدد کیجئے۔ گلی محلے میں ان لوگوں کا خیال خود کیجئے جن کا دسترخوان عید کے روز بھی خالی ہے۔