لاہور (پاک صحافت) وزیر ریلوے حنیف عباسی نے کہا ہے کہ دس ٹرینوں کو آؤٹ سورس کرنے کے لیے پلان طلب کرلیا۔
تفصیلات کے مطابق میڈیا سے گفتگو کرتے ہوئے حنیف عباسی نے کہا ہے کہ ریلوے کے حوالے سے ہم نے ٹارگٹ طے کیے ہیں، فریٹ ٹرینوں کی بہت زیادہ ڈیمانڈ ہے، مسافر ٹرینوں کا ریونیو بڑھ رہا ہے۔ ریلوے کی بہتری کے لیے اقدامات کر رہے ہیں، جعفر ایکسپریس پر جدید اسلحہ استعمال ہوا، دہشت گرد سیٹلائٹ کے ذریعے افغانستان میں رابطے میں تھے، پاکستان پہلا ملک ہے جہاں ہر کوئی ویزے کے بغیر آجاتا ہے۔
ذرائع کے مطابق وزیر ریلوے حنیف عباسی کا مزید کہنا تھا کہ جو غیرملکی غیرقانونی ہوگا اسےنکالیں گے، جعفرایکسپریس پر حملے کے روز ایک جماعت نے شادیانے بجائے، دہشت گرد جس کھڈ میں بھی ہوا اسے ماریں گے۔ ہماری مخالف جماعت کے رہنما جن کو منانے جا رہے ہیں، وہ نہیں مان رہے، جو کام دشمن نہیں کرسکا وہ ان لوگوں نے کیا، نو مئی کو شہدا کا مذاق اڑایا گیا۔
انہوں نے کہا کہ ریلوے کے 14 سکول آؤٹ سورس کر رہے ہیں جبکہ 8 ہسپتالوں سے متعلق روڈ شو منعقد کیا جائے گا، دس ٹرینوں کو آؤٹ سورس کرنے کے لیے پلان طلب کرلیا ہے، ریلوے کے تمام منصوبوں میں شفافیت کو یقینی بنایا جائے گا، ہسپتالوں کی آؤٹ سورسنگ اور دیگر اقدامات سے سالانہ ڈیڑھ ارب کی بچت ہوگی، ریلوے کو ایک منافع بخش ادارہ بنائیں گے۔