لاہور (پاک صحافت) وفاقی وزیر اطلاعات و نشریات عطاء تارڑ نے کہا کہ خیبرپختونخوا میں عوامی مسائل حل کرنے پر کسی کی توجہ نہیں، پی ٹی آئی حکومت نے صوبے میں کرپشن کے فروغ کے سوا کچھ نہیں کیا۔
تفصیلات کے مطابق پریس کانفرنس کرتے ہوئے وفاقی وزیر عطاء تارڑ نے کہا ہے کہ وفاق میں مخلوط حکومت قائم ہے، تمام سیاسی جماعتوں نے اپنے اپنے منشور پر الیکشن لڑا، سیاسی جماعتیں نے اپنے منشور کے تحت عوام سے کچھ وعدے کئے تھے۔ پنجاب میں مسلم لیگ (ن)، خیبرپختونخوا میں تحریک انصاف، سندھ اور بلوچستان میں پیپلز پارٹی کو پاکستان کے عوام نے مینڈیٹ دیا، سیاسی جماعتوں نے عوام کو باور کرایا کہ عوام کے مسائل کا حل ہمارے پاس ہے۔
عطا تارڑ کا مزید کہنا تھا کہ خیبرپختونخوا میں پی ٹی آئی حکومت کو 11 سال ہو چکے ہیں، خیبرپختونخوا میں مالیاتی بدعنوانی اور بے ضابطگیوں میں اضافہ ہوا، خیبرپختونخوا حکومت کو 152 ارب روپے کے مالیاتی خسارے کا سامنا ہے، خیبرپختونخوا میں سرکاری خزانے سے اربوں روپے سوشل میڈیا پر پروپیگنڈے کیلئے دیا جاتاہے،سوشل میڈیا کو ادائیگی فرضی کمپنیوں کے نام پر کی جاتی ہے، خیبر پختونخوا کا مجموعی خسارہ 725 ارب روپے ہے۔
انہوں نے کہا کہ پی ٹی آئی حکومت نے صوبے میں کرپشن کے فروغ کے سوا کچھ نہیں کیا، خیبرپختونخوا حکومت نے صوبے میں مہنگائی میں کمی کیلئے کوئی اقدامات نہیں اٹھائے، پہلے پنجاب میں بزدار کے ذریعے بدلہ لیا گیا اب کے پی میں علی امین گنڈاپور کے ذریعے بدلہ لیا جا رہا ہے، صوبائی حکومت صوبے کے عوام سے کس بات کا بدلہ لے رہی ہے؟۔ باتیں اور لشکر کشی کرنے سے عوام کا پیٹ نہیں بھرتا، ہمیں نصیحتیں کرنے والوں کی اپنی کارکردگی صفر ہے۔