اسلام آباد (پاک صحافت) پاکستان مسلم لیگ ن کی نائب صدر سینیٹر شیری رحمان نے ملک میں بڑھتی مہنگائی اور گیس بحران پر گہری تشویش کا اظہار کرتے ہوئے کہا ہے کہ گیس اور چینی کے بعد قوم اب آٹے کے بحران کے لیے تیار رہے۔ شیری رحمان کا کہنا ہے کہ اس حکومت کی نااہلی کی سزا عوام کو مل رہی ہے۔
تفصیلات کے مطابق سینیٹر شیری رحمان نے آٹے کے بحران سے متعلق بیان جاری کرتے ہوئے پی ٹی آئی حکومت کو کڑی تنقید کا نشانہ بنایا، شیری رحمان نے کہا کہ تباہی سرکار کو پنجاب فلور ملز ایسوسی ایشن نے پہلے ہی خبردار کر دیا ہے، اور اب سردیوں میں لوگوں کے پاس نہ گیس ہوگی، نہ ہی پکانے کے لئے آٹا ہوگا۔
واضح رہے کہ پاکستان پیپلز پارٹی کی نائب صدر سینیٹر شیری رحمان نے اپنے بیان میں مزید کہا کہ فلور ملز ایسوسی ایشن آج سراپا احتجاج ہے، ملز کو کہا جا رہا ہے کہ وہ خود گندم خریدیں۔ انہوں نے یہ بھی کہا کہ حکومت خود کوئی ذمہ داری لینے کو تیار نہیں ہے اور بحران پیدا کر کے مافیا کے لیے مواقع پیدا کر رہی ہے۔ پہلے ہی ایک ہفتے میں 20 کلو آٹے کے تھیلے پر 80 روپے کا اضافہ ہوچکا ہے۔