اسلام آباد (پاک صحافت) اسحاق ڈار نے کہا ہے کہ ملکی معیشت مثبت سمت میں گامزن ہے، حکومتی اقدامات سے معیشت میں استحکام آیا ہے۔
تفصیلات کے مطابق پاکستان بزنس کونسل کی تقریب سے خطاب میں اسحاق ڈار نے کہا کہ 2013 میں ملک میں طویل بجلی لوڈشیڈنگ کا سامنا تھا، ماضی میں ن لیگ نے لوڈشیڈنگ اور دہشت گردی کا خاتمہ کیا۔ ہماری حکومت میں پاکستان دنیا کی 24ویں بڑی معیشت بنا، 2022ء میں ہم نے اقتدار میں آکر ملک کو ڈیفالٹ سے بچایا۔
سینیٹر اسحاق ڈار کا مزید کہنا تھا کہ پاکستان میں معدنیات کا بڑا خزانہ موجود ہے، ہماری حکومت میں تمام شعبوں نے ترقی کی، زراعت، معدنیات اور آئی ٹی کے شعبوں کی ترقی پر توجہ مرکوز ہے۔ حکومت اور نجی شعبے کو مل کر ملک کی ترقی کےلیے کام کرنا ہوگا، پائیدار ترقیاتی اہداف کے حصول کےلیے پرعزم ہیں۔
انہوں نے کہا کہ عالمی سطح پر پاکستان کا مثبت تشخص بہتر ہوا، پاکستان میں کامیابی سے ایس سی او سمیت کئی بڑے ایونٹ ہوئے، لڑکیوں کی تعلیم کے موضوع پر عالمی کانفرنس کا کامیاب انعقاد کیا گیا۔ سرمایہ کاروں کو سہولیات کی فراہمی کےلیے ون ونڈو آپریشن متعارف کرایا۔ اڑان پاکستان منصوبہ ملکی ترقی کا روڈ میپ ہے، ترقیاتی بجٹ میں اضافہ کیا گیا ہے۔