لاہور (پاک صحافت) عطاء تارڑ کا کہنا ہے کہ نئی حلقہ بندیوں کے فیصلے پر اتفاق نہیں کرتے لیکن سمجھتے ہیں الیکشن کا انعقاد بروقت ہونا چاہیے۔
تفصیلات کے مطابق مسلم لیگ ن کے رہنما عطا تارڑ نے پریس کانفرنس سے خطاب کرتے ہوئے کہا ہے کہ مینار پاکستان پر ن لیگ نے تاریخی جلسہ کیا، پارٹی امیدواروں کے انٹرویوز جاری ہیں، امیدوار فائنل ہوں گے تو جلسے بھی ہوں گے۔ تمام سیاسی جماعتیں الیکشن کمشنر پر اعتماد کا اظہار کرچکی ہیں، حلقہ بندیوں پر ہماری گزارشات سن لی جاتیں تو اچھا ہوتا، البتہ الیکشن کمیشن کو تنقید کا نشانہ بنانا رواج بنتا جا رہا ہے۔
عطا تارڑ کا مزید کہنا تھا کہ اڈیالہ جیل میں چکن بھی کھا رہے ہیں، سائیکل بھی چلا رہے ہیں، جیل میں وہ ایسے ہے جیسے کسی بچے کو پلے لینڈ میں چھوڑ دیا جائے، آج لیول پلیئنگ فیلڈ کا رونا روتے ہیں لیکن انہیں اپنے جرائم کا حساب دینا ہوگا اور خمیازہ بھی بھگتنا پڑے گا۔
انہوں نے کہا کہ الیکشن کو شفافیت کا تقاضا ہے آئین و قانون کے مطابق فیصلے ہوں جب کہ حلقہ بندیوں سے متعلق چیف الیکشن کمشنر سے درخواست کی ہے۔