لاہور (پاک صحافت) نگراں وزیراعلی پنجاب کا کہنا ہے کہ جناح ہاوس کیساتھ میانوالی ایئربیس پر بھی حملے کا منصوبہ تھا۔
تفصیلات کے مطابق نگراں وزیراعلی پنجاب محسن نقوی نے میڈیا سے گفتگو کرتے ہوئے کہا ہے کہ میانوالی میں حملہ آور بھوسے سے بھری ٹرالیوں میں اسلحہ لے کر آئے تھے۔ حملہ آور میانوالی ایئربیس پر قیمتی طیارہ جلانا چاہتے تھے، وہاں پولیس کے جوان زخمی حالت میں بھی حملہ آوروں سے لڑتے رہے۔
محسن نقوی کا مزید کہنا تھا کہ پہلے سے طے شدہ تھا کس کو کہاں جانا ہے، 8 مارچ کو زمان پارک میں پولیس پر حملہ کرنے والوں نے 9 مئی کو جلاؤ گھیراؤ کیا۔ عسکری تنصیبات پر حملہ کرنے میں ملوث 11 خواتین جوڈیشل ریمانڈ پر جیل میں ہیں، پورے پنجاب سے 32 خواتین کو گرفتار کیا جبکہ 21 کو رہا کردیا گیا۔
انہوں نے کہا کہ تقریباً 500 خواتین 9 مئی کے واقعات میں مطلوب تھیں لیکن ہم نے گرفتاری سے گریز کیا۔ جیل میں خواتین کو جیل مینوئل کے مطابق رکھا گیا ہے۔ 2، 2 سال پرانی ویڈیوز دکھا کر بے بنیاد پروپیگنڈا کیا جا رہا ہے۔