اسلام آباد (پاک صحافت) سینیٹ نے تمام اسمبلیوں کے انتخابات ایک دن میں کرانےکی قرارداد منظور کرلی۔ خیال رہے کہ تمام اسمبلیوں کے انتخابات ایک دن میں کرانےکی قرارداد سینیٹر طاہربزنجو نے پیش کی جس میں کہا گیا ہےکہ معاشی استحکام کے لیے سیاسی استحکام ضروری ہے۔
تفصیلات کے مطابق سینیٹر طاہر بزنجو کی جانب سے پیش کی گئی قرارداد میں کہا گیا کہ آئین کے تحت تمام اسمبلیوں کے انتخابات، نگران سیٹ اپ میں اکٹھے ہوں۔ قرارداد کے متن میں کہا گیا ہےکہ پنجاب میں علیحدہ دن پرانتخاب ،عام انتخابات کا نتیجہ متاثرکرےگا، اس سے وفاق میں چھوٹے صوبوں کا کردار متاثر ہوگا۔
واضح رہے کہ قرارداد کے متن میں مزید کہا گیا کہ قومی اور صوبائی اسمبلی کے انتخابات ایک ہی روز کرائیں۔ ذرائع کے مطابق سینیٹ میں اظہار خیال کرتے ہوئے سینیٹر طاہر بزنجو نے کہا کہ سیاسی قیادت اور شراکت دار کو ذمہ داری کا مظاہرہ کرنا چاہیے، باہمی مشاورت سے جتنی جلدی ہو الیکشن تاریخ کا اعلان کریں۔