لاڑکانہ (پاک صحافت) وزیراعلی سندھ مراد علی شاہ کا کہنا ہے کہ محترمہ بے نظیر بھٹو اسلامی دنیا کی پہلی وزیراعظم تھیں اور ان کی سیاست پسماندہ طبقات کی نمائندگی سے عبارت تھی۔
تفصیلات کے مطابق وزیراعلی سندھ مراد علی شاہ نے شہید محترمہ بے نظیر بھٹو کی 17 ویں برسی کے موقع پر ان کو خراج عقیدت پیش کرتے ہوئے کہا کہ محترمہ بے نظیر بھٹو ہمیشہ کسانوں، چرواہوں، مزدوروں اور متوسط طبقے کے حقوق کی آواز بنیں، محترمہ بے نظیر بھٹو اپنے والد شہید ذوالفقار علی بھٹو کی طرح بہادر اور نڈر رہیں۔ ان کی سیاست کا محور جمہوریت کے لیے جدوجہد تھی، اور انہوں نے آخر دم تک دہشت گردی اور آمریت کا مقابلہ کیا۔ مراد علی شاہ نے کہا کہ محترمہ نے اپنی شہادت کو قبول کیا مگر آمریت کے سامنے کبھی سر تسلیم خم نہیں کیا۔
انہوں نے یہ بھی کہا کہ محترمہ بے نظیر بھٹو کے دونوں ادوار حکومت میں پسماندہ طبقے کی خوشحالی میں اضافہ ہوا اور وہ غریبوں کے لیے امید کی کرن بن کر اُبھریں۔ مراد علی شاہ نے یہ بھی کہا کہ دہشت گردوں نے محترمہ کو شہید کرکے غریبوں سے امید چھیننے کی ناکام کوشش کی، اور ان کا مقصد پاکستان کی ترقی کو سبوتاژ کرنا تھا۔
وزیراعلی سندھ نے بتایا کہ محترمہ بےنظیر بھٹو کے مشن کو چیئرمین پاکستان پیپلز پارٹی بلاول بھٹو زرداری نے جاری رکھا ہوا ہے اور سندھ حکومت محترمہ کے ’’خوشحال عوام‘‘ کے مشن پر دن رات کام کر رہی ہے۔