کراچی (پاک صحافت) شازیہ مری کا کہنا ہے کہ بلاول بھٹو نے ثابت کردیا مثبت سوچ اور ڈائیلاگ سے اہم قومی امور حل کیے جاسکتے ہیں۔
تفصیلات کے مطابق پاکستان پیپلز پارٹی (پی پی پی) کی مرکزی ترجمان شازیہ مری نے کہا ہے کہ کسی کی سیاسی وفاداری تبدیل کیے بغیر ترمیم کی منظوری بلاول بھٹو کی بڑی کامیابی ہے۔ 26ویں آئینی ترمیم کی منظوری پر فضل الرحمان اور آزاد ارکان کی حمایت سے کامیابی ملی، بلاول بھٹو نے کہا تھا کہ لوٹوں کا ووٹ نہیں لیں گے اور نہ لیا۔
پی پی پی ترجمان شازیہ مری نے مزید کہا کہ تمام سیاسی جماعتوں کے شکر گزار ہیں جنہوں نے اعتماد کا اظہار کیا، بلاول بھٹو نے اپنے نانا شہید ذوالفقار علی بھٹو کے بنائے گئے آئین کو مکمل کیا۔
انہوں نے کہا کہ آئینی عدالت شہید محترمہ بینظیر بھٹو کا خواب تھا، جس کی تکمیل بلاول بھٹو نے کی، پیپلز پارٹی قانون کی حکمرانی اور پارلیمنٹ کی بالادستی پر یقین رکھتی ہے۔